RUMA BARBERO

Miembru fundador del grupu xunta ígor Medio y los hermanos Castor y Félix Castro en 1991 cuando'l so 'esiliu' en Salamanca (onde estudiaben na Facultá de Belles Artes). Anque Ruma foi el gaiteru orixinal nos nuestros comienzos (foi alumnu de Manolo Quirós), hoi céntrase nel bodhrán. Él ye amás l'encargáu de presentar los nuestros temes en directo, l'encargáu del apartáu gráficu de la banda y l'autor de delles lletres. Tamién formó parte de Los Ciquitrinos a lo llargo de once años y bandines tradicionales como La Viérbene y Los Llanzones. Ruma ye de Somió (conceyu Xixón), y vive en Xixón.

semeya: © Álex Martínez Arroyo

XUAN NEL EXPÓSITO

Ye'l nuestru curdioneru. Entamó de mozu cola gaita (foi alumnu del maestru Xuacu Amieva, tuvo tocando la gaita con Llan de Cubel nos sos comienzos y foi el nuestru gaiteru dellos años), depués escoyó la curdión diatónica como'l so instrumentu principal, convirtiéndose nel curdioneru que caltuvo les técniques de la curdión diatónica asturiana y deprendiéndoles a tola xeneración de curdioneros mozos. Tamién tuvo trabayando en grupos d'investigación etnográfico (como l'Andecha Folclor) y fartucándonos a sones que yá formen parte del nuestru repertoriu. Formó parte del grupu Boides primero d'axuntase a Felpeyu en 1994. Tamién forma parte de Los Ciquitrinos. Xuan ye de Villamiana (conceyu d'Uviéu), y vive n'Uviéu.

semeya: © Álex Martínez Arroyo

SENÉN FERNÁNDEZ

D'Avilés. Depués d'un entamu autodidacta, siguió como alumnu de la Fundación de música moderna d'Avilés onde anguaño ye profesor. Amás d'una llarga trayectoria como batería de rock, tocó en formaciones folk-rock como N'Arba, Tejedor y El sueño de Morfeo. En Felpeyu, encárgase del baxu y de la voz principal. Tamién toca'l baxu colos Gatos del Fornu.

semeya: © Álex Martínez Arroyo

ELÍAS GARCÍA

L'otru carbayón del grupu, ye conocíu tamién por ser un miembru orixinal del gran grupu asturianu Llan de Cubel. Esti multiinstrumentista entamó cola gaita y la xiblata a mediaos de los 80, pero al poco cambió pal bouzouki, garrando depués el vigulín nos primeros 90 y convirtiéndose n'ún de los vigulineros que fixeron resurdir la técnica d'esti instrumentu n'Asturies. Llamémoslu pa meter un par de vigulinos nel nuestru primer discu en 1994, y axuntóse al grupu bien lluego. Elías sigui tocando con Llan de Cubel y anguaño ye'l nuestru bouzoukista. Ñació n'Uviéu, y vive en Meres (conceyu Siero).

semeya: © Tuenda

DIEGO PANGUA

El más mozu del grupu, incorporándose a finales de 2001. Crióse nun ambiente de música tradicional y folk, y entamó a tocar la gaita col so pa, Pedro Pangua, importante mayestru gaiteru. Participó nos más prestixosos concursos de gaita asturiana, ganando'l Remis Ovalle (dos vegaes), el de pareyes de gaita y tambor Ciudá d'Uviéu o'l Macallan en Breizh, y anguaño ta enfotáu n'investigar la aplicación a la gaita asturiana d'ornamentaciones propies d'otres cornamuses. Amás de la so llínia como gaiteru solista, foi integrante de la Banda de Gaites Fonte Fuécara, collaboró col Colectivu Etnográficu Muyeres y formó parte del grupu DRD. Diego da-y tamién la flauta de madera, que deprendió de xeitu autodidacta y col llavianés Baldomero Gutiérrez y el flautista de Llan de Cubel, Marcos Llope. Anque ñacíu en Posada Llanera vive en Xixón.

semeya: © Álex Martínez Arroyo

LISARDO PRIETO

Pixuetu d'El Pitu (Conceyu Cuideiru), axuntóse al grupu en 1999. Entamó cola gaita asturiana -como faen tantos músicos asturianos- hasta que darréu interesóse pol vigulín, gracies al tamién vigulineru pixuetu Guzmán Marqués, de Cuideiru; tres dellos años ameyorando la so técnica n'Asturies y per ende, y investigando l'aplicación de les ornamentaciones de gaita asturiana al vigulín, anguaño Lisardo ye'l profesor principal de vigulín na Asturies central y oriental. Nel grupu encárgase del vigulín y fai coros. Foi miembru del grupu N'Arba. Tamién destaca la so estaya como productor musical de proyectos como Xideces. Lisar vive n'El Pitu, Cuideiru.

semeya: © Álex Martínez Arroyo

MOISÉS SUÁREZ

Guitarrista de una llarga trayectoria dientro de la escena rock asturiana. Formóse na Fundación de música moderna d'Avilés onde acabó siendo mayestru. Entró nel mundu'l folk de la mano de Los Gatos del Fornu, tamién tocó colos ribeseyanos Corquiéu. Trabaya como mayestru de guitarra en Ribeseya y Xixón. Ñació y vive en L'Arena, conceyu de Sotu'l Barcu.

semeya: © Álex Martínez Arroyo

ANTIGUOS FELPEYOS

Como ye normal en toles formaciones, el movimientu de xente ye constante. Dellos músicos y collacios pasaron per Felpeyu, dalgunos cuantayá, otros hai menos tiempu, pero toos y caún d'ellos ficieron la so aportación al soníu de la banda. Esti apartáu pertenez a la xente cola que tuvimos la suerte de trabayar a lo llargo de los caberos venti años.

ÍGOR MEDIO

Ún de los miembros fundadores del grupu. Ígor tuvo una formación heteroxéneo; creció nun entornu de cantu coral y canción asturiana -que so pa, so ma y la familia practicaben- y tuvo estudios de música clásica y esperiencies col blues/rock enantes d'entamar cola música folk, desendolcando un estilu personal y eclécticu d'arranchar y interpretar la música tradicional asturiano. Entamó tocando la guitarra y la mandulina, pasando depués al buzuki como'l so instrumentu principal. Foi la voz principal, el buziki y el principal arreglista'l grupu hasta la so desapaición na tráxica alborada de San Xuan de 2006. Tamién se-y recuerda como productor musical y arreglista. Foi músicu de Tejedor. ígor yera del barriu xixonés del Nataoyo.

semeya: © Silvia Barbero

CARLOS REDONDO

Carlos yera'l miembru del grupu cola mayor y más variao esperiencia profesional, como músicu, mayestru, productor y inxenieru de soníu, anque yera más conocíu n'Asturies como'l cantante y baxista del llexendariu grupu de pop-rock Los Locos. Trabayó intensamente na música pop-rock enantes de metese na música folk nos primeros 90, y axuntósenos xusto depués de producir el nuestru primer discu, Felpeyu, en 1994. Tocaba guitarra y baxu llétricu, y facía voz principal y coros. Fuésenos xunto con Ígor el 24 de xunu de 2006. Carlos ñaciera y vivía en Xixón.

semeya: © Silvia Barbero

CASTOR Y FÉLIX CASTRO

D'Ourense, son los otros dos miembros fundadores de Felpeyu xunta Ruma y ígor, xuntándose con ellos n'ochobre de 1991 cuando estudiaben Derecho na Universidá de Salamanca. De mano, la idea yera namás armar folixa pelos chigres de la ciudá y arreventar tunes, pero bien ceo entamaron a facer arranchos propios y enantes de fin d'añu acabó ñaciendo Felpeyu. Mentres tuvimos xuntos nesta primer etapa, hasta avientu de 1993, el grupu desendolcó un repertoriu de música asturiana y gallega al 50% -siendo hasta la fecha la primer y única formación en facelo- y, amás de dos inclasificables maquetes, grabamos un par de temes nun discu compartíu con otros grupos galegos. Anguaño, los ximis tan ente los músicos más capaces y versátiles de Galicia, y son probablemente los que más y meyor tan trabayando p'asoleyar repertoriu inéditu del estensu cancioneru gallegu. Siguimos en contactu permanente con ellos, que tamién collaboren con nós en grabaciones y actuaciones de Felpeyu cuando tenemos la oportunidá. Amás de la so carrera musical, los dos trabayen d'abogaos y tan establecíos n'Ourense (Galicia).

FERNANDO OYAGÜEZ

Entamó con una educación clásica, anque interesóse bien ceo polos raigaños y les músiques tradicionales, tornando nun vigulineru creativu y versátil gracies a les sos esperiencies con estremaes músiques folk, incluyía la de la so tierra. Axuntóse a nós en 1997 y ye por él qu'incluyimos nel nuestru repertoriu dellos temes castellanos que mos deprendió, de magar tocar con nós ta centráu nel repertorio asturianu. Forma parte del grupu Blima. Tuvo con nosotros hasta 2011. Fer ye xixonés d'adopción y vive nel barriu'l Carmen.

semeya: © Álex Martínez Arroyo

DUDU PUENTE

Vieyu amigu del grupu dende'l principiu (tuvo un grupu con ígor y Isidro a entamos de los noventa) fixo estudios de voz y baxu llétricu n'Amsterdam y Estaos Xuníos. Volvió pa Xixón en 2006 xuntándose a nós a finales d'añu. Anque namás tuvo un par d'añinos cola banda, ye la voz principal y el baxu que podéis sentir nel discu Canteros. Nel so curriculum destaquen les munches formaciones de jazz coles que tien tocao y cantao. Anguaño toca cola big-band del conservatoriu de la ciudá onde ñació y vive, Xixón.

XEL PEREDA

Entró xusto depués de grabar la nuestra maqueta, Fuxide, Oricios!, nel 1993. ígor y él yá yeren collacios de magar estudiaben música y guitarra xuntos na mesma academia, en Xixón, asina que nun tardó muncho n'enguedeyase cola música de Felpeyu y al poco yá taba dándo-y a la guitarra acústica con nós. Xel foi perimportante pa sentar les bases del soníu de Felpeyu; a través d'Elías García traxo la afinación abierta pa la guitarra (DADGAD), trabayando xunta ígor y Ruma les bases rítmiques que mos caractericen, y el so sen armónicu y dinámicu entá se siente na nuestra música. Les sos guitarres pueden sentise nel nuestru primer cd. Anguaño, ye ún de los guitarristes de folk más importantes d'Asturies, y lleva dellos años faciendo un bon llabor con Llan de Cubel y Lucas XV amás del so trabayu como productor. ñació y vive en Xixón.

© Mateo Sanchís

flickr

ISIDRO SUÁREZ

Ún de los primeros músicos colos que Ruma y ígor entamaron a tocar música asturiana, allá pelos caberos 80. Anque siempre foi gaiteru, entamó cola flauta de madera xusto enantes de xuntase a nós en 1994. Más allá de la técnica, Isidro ye definitivamente un flauteru con toque; apurriónos delles pieces bien guapes, y una sensibilidá especial a la hora d'entender les melodíes de la tradición asturiana que mos educó enforma la oreya. Siguimos armándola con él delles veces, y no qu'a la música folk se refier, siempre ye importante pa nós tener el so criteriu en cuenta. Anguaño ta más dedicáu a la guitarra. Sigue viviendo en Xixón.

TOÑO GÓMEZ

Toño ye otru de los collacios que conocemos de magar entamamos a tocar música asturiana. Allá per 1995 facíamos sesiones con elli un día sí y otru tamién, asina que pensamos que lo más normal yera que se xuntara dafechu al grupu. D'esta manera tan célebre estrenó Felpeyu la formación con dos vigulinos, na que'l toque enérxicu de Toño complementábase perbién col arcu fluyíu y la precisión d'Elías. Música aparte, siempre da gustu trabayar con persones tan grandes como esti mozu. Toño ye un gallu de la inxeniería -la so profesión-, que lu mantién siempre perocupáu. Otru playu que de Xixón.

LUIS ÁLVAREZ

El nuestru collaciu Luis álvarez, tamién músicu, xixonés, estudiante de Belles Artes, y el nuestru compañeru de pisu. Demasiaes coincidencies como pa nun acabar tocando con nós. Luis foi'l baxista de Felpeyu nel branu de 1992 y grabó na nuestra primera maqueta.

LOS OTROS FELPEYOS

Hai delles persones qu'en mayor o menor midida formen parte integrante del grupu, anque nun se-yos vea enriba l'escenariu; xente ensin la cual nun seríamos quienes a facer la llabor que facemos. ésti ye'l so apartáu.

SLAVEN KOLAK

Slaven foi'l nuestru técnicu de 2004 a 2007. Conocímoslu al traviés de la so llabor colos collacios del grupu N'Arba, y prestónos el so conceptu y efectividá nel soníu tanto como'l so carácter, asina que-y ufiertamos xuntase a la panda. Slaven ye de la República d'Hrvatska (Croacia), y vive en La Calzada, Xixón.

semeya: © Eva Braga

FERNANDO ÁLVAREZ-BALBUENA

Esti rapaz, amás de ser una verdadera entidá na investigación y l'usu de la llingua asturiana, ye un perbón lletrista y ún de los responsables de les nuestres lletres. Ye l'autor de Tierra, el cantar que-y diera nome al nuestru segundu discu, y siempre mos presta una ayuda perimportante a la hora d'encarar el testu d'un tema. La so conocencia de la llingua asturiana, dialectoloxía y variantes permítennos precisar nes nuestres lletres hasta estremos que siempre mos sorprenden. Fernando aporta bayura de léxicu, rigor llingŁísticu, y la seguridá de tar faciendo les coses como tien que ser no que correspuende a la nuestra llingua. Trabayar con elli siempre ye una garantía y un placer. Ye d'Avilés (conceyu Avilés).

SALVA LÓPEZ

Foi'l nuestru técnicu de soníu regular munchos años. Entamó a trabayar con nós por medio de Carlos, yá qu'entrambos enseñaben nel Taller de Músicos de Xixón (Salva ye un perbón teclista, de formación tanto clásico como moderno, y l'encargáu de los teclaos Hammond que tanto mos presta meter nos discos). D'unos años p'acá centró la so actividá profesional como técnicu de soníu y post-producción d'audio/vídeo, anque siempre ta dispuestu a xunise a nós pa facenos el soníu en cualquier parte. Na semeya vémoslu trabayando na unidá móvil qu'improvisamos pa la grabación del nuestru discu en directo, Live Overseas. Salva ye de Xixón, anque ta establecíu en Madrí.

BONI PÉREZ

Lleva yá munchu tiempu na llabor d'escribir lletres. Entamó trabayando pal grupu de rock Los Locos pelos años 80, colos que fizo delles canciones pa la Historia, y nestos últimos años ta más enfotau na música folk. Con Felpeyu, Boni ta 'especializáu' na adaptación de lletres tradicionales, componiéndo-yos nueves estrofes que les averen enforma a los sentimientos de los asturianos d'anguaño, dándo-yos un oldeu mui frescu, al tiempu ellegante y reivindicativu, cosa que nos presta enforma. Escribiónos una lletra ablucante pal nuestru segundu discu, El Besu, y volvió a trabayar con nós faciéndonos otru par d'elles nel Yá!, Nun quiero coyer la flor y Faltosa, perguapes adaptaciones de sendos cantares d'orixe tradicional. Boni alterna la so faceta d'escritor (en versu y prosa) en llingua asturiana cola docencia, y vive en Xixón.

SERGIO RODRÍGUEZ

Ye ún de los técnicos de mayor prestixu na música asturiana. Vien siendo'l nuestru técnicu de soníu dende 2006, tanto en directu como nes grabaciones nel so estudiu de grabación TUTU. Amás de técnicu, Sergio ye un perbon baxista con una llarga trayectoria en grupos de tola contorna d'Avilés, amás d'otros de renome como Los Del Tonos. Tamién destaquen proyectos musicales propios como Tutu Studiu 07 y Soncai System. Vive y trabaya en Los Campos, conceyu Corvera.

ROBERTO DÍAZ "TANA"

Ye otru de los habitantes d'Estudios Tutu, onde trabayamos con él n'alguna de les nuestres grabaciones y d'ehí, como nun podía ser d'otra manera, pasó a los directos. Collaciu de los felpeyos dende los tiempos del Xixón-sound cuando yera batería de Cactus-Jack, destaquen tamién los sos averamientos al mundu del folk como batería de proyectos musicales como Herbamora y Xideces.

oriciu